Даьржа, шера доаг1а Эса. Хина
ийсте ц1и а йийза баг1а 1уй.
Морхех корта кхета вампал хинна,
лакхера 1очухьежаш латт Пхьуй.

Леймой-лоам т1а дошо ч1угал яг1а, -
чубуза малх... дижад лохе 1и.
Г1инбухера т1уна къахь хьалйоаг1а.
Моттиг лех 1а хьайна сала1а.

Моттиг лех 1а й1айха бийса яккха,
йоачан хуле - к1ала отта берд...
Новкъост хургва хьона алхха аькха...
Моттигаш 1а эрна, зехьа къерд.

Юхасаца, мухь 1обаккха гира,
ара юкъе бийса яккха 1а.
Йоачанах е шелалах ма кхера, -
йиш хургья хьа т1аккха сала1а.

В1ашт1ехьдаргда лоамий хозне йовза,
даьре чаьтар - сийна сигле го:
цу чу г1олла бода геза г1оза-
бетта гонахьара лира го.

Маьре ухача седкъашка хьежаш
бийса йоаккхаргья 1а, наб ца еш.
Х1аьта 1уйранна лувцаргда, къежаш,
маьлха з 1анарий дутара геж.

Хетаргда - хье ц1акхаьчача санна,
дийнвелча мо хьай ворхх1е а да.
Ча б1аргаяйча, тотем таръенна,
яхаргда 1а цунга: кулг хьада.

Леларгва хьо, г1анкара а ваьнна,
хьайна мел хайначох тамаш еш.
Маршалла, воше! Цкъа е мохк байнар
юхавоаг1аргхиларах со теш.