Тхьа, даьлан юхь-сибат, куст,
хьай хайра, фаьрал да тхона.
Бора боара - кхаьра уст
боалабаьб х1анз оаха хьона.

Щеча даьре ба, гой, нич,
маьлха ткъовронаш я му1аш.
Яллац укхан ц1ийх хув, хич.
дахкац укхан я1ах муаш.

Щув мо, ц1ена ба ер, Тхьа.
ба, сув мо, хьаткъара баьнна.
Маькха ка хьувкъийта тха,
йоачан я тхона, йоал санна.

Д1аьха де тха тукхам, фу,
дебаде тха даьхка, даьца.
Листа хилиита тха хьу.
1алашдетхо хица, баьца.

Беркате лоаттаде гий.
Камаьрша хилиита къонах.
Лораде тхо сура кий
чуувза езача вонах.

Дерста де тха герга кха,
дарбана де тха фо, лаьтта.
Ч1оаг1ле ялахь тхона, Тхьа,
г1аьрашта духьала латта.

Гаьна баккха к1анта пхо,
кара билла сечоа маха.
Хьай ц1и лоарх1аш дола тхо
хьай къахетамах ма даха.

Дошо делахь хьаыпан шу.
Дото делахь нувра лийта.
Т1а мел доаг1а къона шу
маьрша-мукъа тха хилиита.

Ма дайталахь унга доал,
шишха елахь берза1азал.
Кот ма ялийталахь тхол
кога к1ала йоалла 1оажал.

Лаккха леладе тха сий.
Той ма хадийта тха коара.
Раьза хиле, къоабалдий,
д1аэца тха супа боара.