...Укхаза - къаьна Хаьни.
Мизкъденна дос.
Йокъал кхийттача г1аьний
дутара бос.

Диг латац хений гарех,
гоалъиккхе дек, -
тата детталуш кхерех -
лувкхера бек.

Хоаночо ц1и ювз ара,
яй оттабу
т1аккха - хьалаьце коара -
устаг1а був.

Тулабий, цу сахьате
кхабохийт из.
- Меца дий шо? - хоатт Хьате
(хаьла я оаз).

Мангала кий тулл цунна,
чо беннаб къедж.
Къежаш, к1ирвенна тхона
б1ара из хьеж.

Цхьаькъа вах Хьати Хаьне.
Болх бу, сало1...
Т1ом беш Авганистане
ва, йоах, ший во1.

Ц1а ца вар кхер ше, яхаш,
дари ду цо...
Араяхь меза улхаш,
хьокхабаь цу.

-X1анзарчоа х1ама кхалла.
Яьккхденнад шо, -
аьле, кхоалена к1ала
оттаду шу.

Цуи модзи дуъ оаха
(Модз хестаду!)
Хьате яь чура сиха
коарчам хьадулл.

1и г1етт дулха т1ара.
Хьажо садукъ.
Даьрача г1аьра тара
оаха из дуъ.

Д1ахо, дилан кад мале,
оаг1ора доал...
Хьайоаккх фусамдас г1аьле,
озий оаш, оал.

K1ур бохийт оаха тхьамках,
оаламаш дувц
К1инда Шоах, Хоаной Хингах..
Тема аз хувц,

Хоаной хоннаш ба, аьле...
Къовсаме доал.
Хьати, вела а вале,
согахьа воал...

Бакъхургда, оал цо, х1анз а
Гуржег1а бах
Ханишвили, Ханидзе;
уж тха ба, йоах...

Къамаьлаш совц... Сигала
седкъий хьакхет...
Хаь мо латт шира г1ала.
Тхона наб кхет.