Алба-ерда, 1имараш.
Эсо етта голаш.
Маьлха дошо з1анараш -
Т1аргамара г1алаш.

Сигленах чакхйийннай уж,
Даьлага хьалкхаьчай.
Даьлан 1арш я ийже гуш,
из гураш ба г1алг1ай.

Цунца - Малхаца мара
моаршал-хьоашал дац цар.
Лаьчан корта бола Ра
ва цар Даьра, Даьсар...

"Хьам мо, хьамсара ва из,
цун хьамара текъ тхо.
Маьлха Аза я цун оаз,
цун ерда ц1и - Ткъа,Тхьа...

Маьлха Аза - маьлха оаз,
малха хоастам яхар,
тхона хьа оаз-илли хоз:
хайра де тха вахар!

Фаьрал далахь тха фуна,
ираз-аытув белахь!
Тхоаш кхеллача тхоай даьна
гарга кхоачаделахь!

Цунца мара з1и яц тха,
цунна сужне ух тхо.
Оарцаг1вала тхона, Тхьа,
къе-мискачар оарцхо!"

Иштта декаш санна хет
Т1аргамара кхерий...
...Вайна, езар, наб т1аг1ерт...
Лачкъ хьа б1аргий чкъаьрий.

- Даьй оазаш ях укхаза.
Сона хоз уж, - оал 1а. -
Со я, гой, Маьлха Аза,
хьо ва, гой, лув г1алг1а.

Х1ама хувцаденнадац.
Даим дахаргда вай.
(Аз дувцараш вай шиъ дац,
аз бувцараш - г1алг1ай).

Маьлхаца хоттаденнад
в1овний ира бовхьаш.
Атаг1а дохк т1аденнад.
Эсан кер ба бувхьаш.

Фордах кхета сихденна
дода лоаман шовда.
Маьлха дуне цхьа дег1 да.
Из ца ховр ва 1овдал.