Наркаш - хьо санна - 1ажаг1а.
Декадеш аьли,
вайна духьала 1одоаг1а
Г1улахи г1аьли.

Укх сахьате гучаяргья
кхоллама тамаш -
В1овнашке. Хьо амаг1ъяргья;
т1адаргда ткъамаш, -

г1оттаргда вай шиъ сигала -
г1алаш т1а даргда;
к1ала да 1одода Г1ула
тай мо хетаргда...

1очухьежаш даг1аргда вай,
б1огора ухаш...
Б1арг ма кхоачча - баьццара бай.
В1овнех хьерч морхаш.

Морхаш ухк хьа б1аргашка а,
г1аддаха, леп уж:
гу сона цар чу к1ай шак1а,
ц1ераш я баппаш...

Кулг т1оададу хьа мосаша,
шийла да бордаш, -
гуйран маьлха з1анараша
хьанна доах барташ?

Малха тийкъаб вай дай хьалха,
малхага ихаб.
Малха гарга хилар духьа
г1алашка баьхаб.

Цудухь йиллай В1овнашке а
сел лакха фе т1а...
Малх - г1алг1ачун в1ови кийи,
цун уйла, фета.

Аз-м безам а малхаца бувз
(малхаш да хьо-со).
Маьлха дошоча таьшца бувц
хьа керта хьоаса...

Наркаш - хьо санна - 1ажаг1а.
Гуйре - хьо санна.
Хьай хайра - маьлха тамаг1а -
тел 1а х1анз сона