Бердах к1алдоал наькъа така -
баьца къажах даьккха ж1ака,
д1ахо - т1ехига гечув да:
оалхазарий фуий жаг1а
мо бола жог1ара жаг1а
б1аргагуш хьаь1а да шовда.

Укхаза сужд деш вай даг1а.
Мел дукха ха я вай даха
укх лаьтта, хет е мотт вайна.
Дагабох... Моалочун салтий,
Жерлоам т1а желаш яь жалтий,
эздий сувнаш - воай ши нана.

Диважа дил мийнна дивий,
оалам бел: Даьла шун да вий?
Хьанда е во1 хиннав Г1алг1а?
Хьанах е сенах ваьннав из?
Хьанна е сенна тийкъав из?
Чана? Берза? Саьна? Г1ала?

Гола теха дода Г1алми...
- Укхаза х1анз цхьаккха г1ал бий: -
хаьттар аз цкъа хьунхочунга.
- Хьунаг1а доацаш х1ама дац...
Бакъда, г1ал сона байнабац, -
аьнна, 1иршинг даьлар цунга.

Г1ула 1одолалучча улл
Г1улой овла е кхала Г1ул,
Т1умг1ой кхала я Г1олашпхье...
Пхеда, кхала, овла, шахьар...
Этрури мо, шийтта шахьар
чуйоаг1аш хиннай Г1алг1айче.

Шийтта маьже йола хьа дег1
денна даьлагара аз дех...
Седкъан хикуст леп Г1алме чу.
Шийтта аи дола г1алан бухь
(вай дай Малхага кхача бухь)
сигала беттаб г1алг1ачо...

Шийтта ерда-ц1а да маьлха:
шера никъ бе безаш й1аьха
я царна юкъе йоалла юкъ, -
шийтта овлаьъ лала волаш,
воаг1аш латт Из (наькъа г1олаш!),
-лир доагаш я цун герга юхь...

Ало, Рало, X1ало, Гело...
Эзар ц1и 1а, тха Малх, лело!
Г1ал яхаш а хиннай хьа ц1и.
Г1ал - хьа лаьттара цхьа сибат.
(Цкъаза хьа юхь - г1алан-саь бат).
Г1алг1аи бувзам хиннаб хьоца.

Малх яхалга да в1ов-г1ала.
Малх яхалга - сай а г1ал а.
Саьна тийкъаб сакаш-скифаш.
Сай - саг - сак... Г1алах тийшаб-теш
вай дай хастаг1а? (Со-м хьох теш).
Иштта кхеллай наха мифаш.

Мехкара мехка уж кхелхай,
халкъий, даьлий ц1ераш кхалхай.
Дисад ма1ан т1апа дешаш,
кусташ а кхераш т1а дехка...
X1анз укхаза юхадаьхка,
латт вай цар хьаракаш дешаш.