Адамашта, далла, кхела дицденна,
М1аг1ат1а даг1а элгац
б1аргадайча хьане, кхоачара хинна,
са дега дицде магац.

Каст-касттавоаг1а со укхаза се цхьаь,
веханза вола хьаыпа...
Сатийна я. Тхьайса хий санна, сеца
латт ха - ворх1 ебарх1 б1аыпу.

Туристий наькъашта юстара даг1а
элгац, гонахьа хьу я...
Меллашха делхача мелача дог1о
баьцовг1ай лордаш хьею.

Лаьттара кашамаш доахк хьуна юкъе,
чу алхха титеш яда...
М1оаг1очун М1аг1ат1е Чулахой юкъ я,
Салгхой маьт-макхал, ерда.

Гу сона элгаца маркхалах боалла
хьаг1а кур, - хайран символ...

Барче - оагилга чу - дошо к1удж бола,
Тушоле котам - тушол...

Меттахьа йоал из, хьалг1отт - со чуваьлча,
хаттар отт сона кер чу:
"Даьли а елча, зама а д1аяьлча,
хьо фу деш яг1а укх чу?

Фуд 1а лорадер аьргача дунен т1а?
Элгаца супал? ц1енал?
Мел ха яьннай укх ц1елача дукъа т1а
боара ца ду е синнел?"

Б1и хьахьокх сога даьлан оалхазаро,
кера кхо фуъ улл цу чу...
("Таханара даьлий, ва дошо Рало,
тара бац хьона цхьа чо..." -

хеталу сона, малха т1ехьа хьежаш,
элгаца юхе латташ...)
1олег гаьна т1ера баьццара хьачаш,
моша да къахьа датташ.