| |
Жа1уно ж1алешта деш деттад.
Набарах баьннаб жамотт.
Хьалкхийттача ц1аьскаро ц1ийдаьд
лоа улла лоама лоажот.
Д1аьха 1енаш дада ч1ожешка.
Дехьа-сехьа ухк Бийргаш.
Г1улахи г1ов латт лувкхерашка,
орган санна ек дийхкаш.
Ц1увний ц1а даг1а наькъа йисте,
ц1увний ц1а - ц1ена элгац.
Ц1и йоагаяьй цу чу укх б1аьстий, -
наха шоай акхал дицдац...
Даьшта деза хийттар т1ехьено
дайдаь ца 1еш харц а даьд.
Щенонах ц1оно яьй вай хано,
супа мел дар хоарцадаьд.
Жаи доахани доахк г1алашка,
малхарча каша - ж1алеш...
Транзистораш я г1окказашка
доахаш вай заман иллеш.
Сийрда кхоане хьакхоллаш да, йоах,
карадерзадеш 1алам...
Наьха дегашка т1аяьннай йоарх1 -
феса еш иола 1 амал.
|
|
Кхераме ба г1аьра сакхетам,
к1оршаме, къаьра - синош.
Рузкъа бахьан - боацаш къахетам -
вохкаргва цар шоай воша.
Дохоргда ерда, доагоргда хьам,
йовхаргья - хьаштдий - Даьхе...
Царна истори - йоаккха х1ама!
Царна культура - даьг1е!
Кхачан программа кхоачашйича
- сагота бац хьакимаш, -
- вешта аьлча, - шоай шун т1а гича
- маша даьтта, хьакхий марш...
Г1адж теха варнахча яьй Лоамех:
Кхоша хьалъяьхай юрташ.
Ког мел баьккхача - хьо цец -
амаг1воахаш - "акха" туристаш.
Цул совг1а, наькъаш дохкаш латт х1анз:
аьшка никъ - болата урх.
Геологаша лех дошо ганз,
корая мег тхона, йоах...
Малхарча каша юха 1одувш
деш диаь даьнна ж1алеш.
Жа да босаг1а, н1аний мо, хьувш.
Дек Леонтьева иллеш.
|
