Замо вайна дитар - г1ири;
гувнах яьй кхарта.
Баьццара к1омала эри
т1аяьннай юрта.

Хала да теша x1анз, хьалха
укхаза наха
безам хьийгаб, аьлча. Алхха
йокъ - массанахьа.

Дайнад г1алашкара кхуврчаш,
вахар а деннад.
Цар дуне нахьара хулчеш
т1аювхаш хиннад.

X1аьта а г1оза баьхаб уж,
хьаьнала баьхаб.
Хьувкъама дошо гуйре гуш -
б1аьстан т1оа аьхаб.

Т1ехьленна еш хиннай г1алаш,
т1ехьенна лаьрх1а.

Элгацашка - даьлий б1алг1аш, -
тийкъаб уж Малха.

Кхоане йита г1ийртаб вайна, -
из бахьан къийсад, -
вай къина йолча г1ойленна
лаьтта цар хьийшад.

Лииннаб - мехках балара 1анз
ловш - г1инбух техкаш.
Дог1о йошаеш яда х1анз
цар мура т1ехкаш.

К1арцхалаша йикъай моттиг,
къедж а яьй хано.
Гу сона, малх мо, ц1е беттиг
т1атулла къоано.

Т1ехкашта юкъе ваг1а из,
ше ва, хьам санна.
Вала венав из укхаза,
хеталу сона.