Аьге-кхала, Аьге-кхала,
ж1арг т1алатта лакха г1ала,
кора т1а - маьлха тамаг1а.
Турист ваьннав цец-амаг1а,
г1азакъвахав, г1анкарваьннав.
Турист г1алий т1ара венав.
Йоах цо: "Са да ваьхав укх чу.
Са ваха ираз хиннадац.
Сибарег1а ваьв со... Ловча!
Укхаза мара са ц1ай-м дац.
Ц1авенав х1анз, сецав Грозне.
Тахан, гой, лоамашка кхаьчав,
лоамашка - сай даьй даьхене.
Да-м са Казахстане кхалхав.
Цига бейнаб нанас баьраш,
нана ше а цига еннай.
Дог са - да1а - дорха, даьра,
кхел са михоудорг хиннай..."
Эрсий мотт ба к1анто бувцар,
берий ц1aг1a кхийннав ше, йоах.
Йо1 я цунца, цо кулг лувцаш,
йи1иго г1алий сурташ доах.
Бе-башха дий-хьог1 йи1ига-м,
даь г1адвахар кхетадой-хьог1?
боагаш болча цун шин б1арга

даьна мел гур б1аргагой-хьог1?
Тамаш я-кха. 1охов йи1иг.
К1аьдъеннай из, мец а еннай,
Бакъда, Лоаме - "хоза моттиг" -
тахан цунна б1аргаяйнай.
Раьза я из. Папа, йоах, цо
укхаза даха дувла вай?
Хетаргахьа, йи1иг охца
оамал йолаш я, ший даьй
санна, - ураэккх из, т1аккха
г1алан пена т1а хьалт1айоал.
Аьге-кхалал лакхе цхьаькха
цхьа хоза юрт хьагучайоал -
морхашта юкъера ц1аьхха.
Йи1иг г1алан пена т1а латт,
г1азакъяьнна, г1анкаръяха,
б1аргашка леп цун села1ад:
"Папа, хьажал, хоза миштай!
Со укхазара ц1аг1оргьяц!"
Дас 1ойоаккх из, тейий, хьаьсте,
даьна цунга фу аргда хац.
Ше ва из, бер мо, г1адваха,
эккха доал цун керара дог...
Лохе шовдилг дек к1ач1даха,
лакхе маьлхах з1огалаш доаг.